விடியும் பூமி அமைதிக்காக விடிகவே - 1000 மாவது தேன் சொட்டு

போரின் பிளந்த வாயில் அகப்பட்டிருக்கும் தமிழீழ மக்களுக்காகவும் உலகின் போர்க்களங்களிலெல்லாம் அநியாயமாக அகப்பட்டிருக்கும் மக்களுக்காகவும் ஏனைய உயிர்களுக்காகவும் தேன் கிண்ணத்தின் 1000 மாவது பாடலாக இந்தப்பாடல் அமைகிறது.

சின்ன வயசில படிக்கேக்க எதியோப்பியாவில் பட்டினியால் ஒட்டிய உடலுடன் இருந்த அந்தப் பெடியனைப் புத்தகத்தில் பார்த்தது போல இப்ப ஒவ்வொரு நாளும் என்ர இரத்த உறவுகளைப் பார்க்கிறேன். பசியால் கதறிய குழந்தையைப் பார்க்க சகிக்காமல் செல்லடிக்கு பயந்து இருந்த கணவனைப் பால்மா வாங்கிவா என்று கட்டாயப்படுத்தி அனுப்பிய மனைவி கணவனின் சிதறிய உடலைப்பார்த்து கதறி அழுவதைப் பார்க்கிறேன். யுத்தத்தின் இன்னொரு கோர முகமாக தினமும் என் சகோதரிகள் கொடூரமான முறையில் வன்புணரப்பட்டு கொலை செய்யப்படுவதை வாசிக்கிறேன். குழந்தைகளை மலர்களுக்கு ஒப்பிடுகிறார்கள்: அந்த மலரொன்று மலரும் முன்னமே இரத்தம் கசிய கசிய பிய்த்து எறியப்படுவதைக் கண்ணீரோடு பார்க்கிறேன்.கடவுளின் குழந்தைகள் என்று சொல்லப்படுகின்ற கட்புலன் ,செவிப்புலன் இழந்த சிறார்கள் எல்லாம் இரத்த வெள்ளத்தில் சிதறிப்போய்க் கிடக்கிறார்கள் : கடவுள் கெக்கட்டம் விட்டுச் சிரிக்கிற மாதிரியிருக்கு.மனம் பிறள்கிறது.

போரால் சபிக்கப்பட்டிருப்பது தமிழர்கள் மட்டுமல்ல அப்பாவிச் சிங்களவர்களும் தான். முந்தநாள் ஊருக்குப் போன் பண்ணும்போது மாமா சொன்னார் வன்னிக்கு அனுப்புறதுக்காக அவேன்ர வீட்டுக்கிட்ட இருந்த 2 சென்ரி எடுத்தாச்சாம். ஒரு சென்ரில இருக்கிற ஆமி வந்து 2 நாளா சாப்பாடு வரேல்ல என்று அழுவாராப்போல சாப்பாடு கேட்டதாம்.

ஒருமாமா தலையில காயப்பட்டு இருக்கிறார் என்று செய்தி வருகிறது. மற்ற உறவுகள் உயிரோடு இருக்கிறார்களோ இல்லையோ என்று ஏங்கி ஏங்கி தினமும் காலையில் இணையத்தளங்களில் இறந்தவர்கள், காயப்பட்டவர்களின் பெயர்களை தடவித் தடவிப் பார்க்கிறேன். வேலைக்குப் போனாலும் வேலை செய்யமுடியாமல் இருக்கிறது. வேலையிலிலருந்தும் உடல் கருகி வரிசையில் அடுக்கப்பட்டிருக்கும் அண்ணாமார்களையே திரும்ப திரும்ப பார்க்கிறேன். இனிமேலும் தாங்க முடியாது.விடியும் பூமி அமைதிக்காக விடியட்டும்.


வெள்ளைப் பூக்கள் உலகம் எங்கும் மலர்கவே
வெள்ளைப் பூக்கள் உலகம் எங்கும் மலர்கவே
விடியும் பூமி அமைதிக்காக விடிகவே
மண்மேல் மஞ்சள் வெளிச்சம் விழுகவே
மலர்கள் சோம்பல் முறித்து எழுகவே
குழந்தை விழிக்கட்டுமே! தாயின் கதகதப்பில்
உலகம் விடியட்டுமே! பிள்ளையின் சிறுமுக சிரிப்பில்

(வெள்ளைப் பூக்கள்)

காற்றின் பேரிசையும் மழை பாடும் பாடல்களும்
ஒரு மௌனம் போல் இன்பம் தருமோ!
கோடி கீர்த்தனமும் கவி கோர்த்த வார்த்தைகளும்
துளி கண்ணீர் போல் அர்த்தம் தருமோ!

(வெள்ளைப் பூக்கள்)

எங்கு சிறு குழந்தை தன் கைகள் நீட்டிடுமோ
அங்கு தோன்றாயோ கொள்ளை நிலவே!
எங்கு மனித இனம் போர் ஓய்ந்து சாய்ந்திடுமோ
அங்கு கூவாயோ வெள்ளைக் குயிலே!

(வெள்ளைப் பூக்கள்)



படம்: கன்னத்தில் முத்தமிட்டால்
பாடல்: வைரமுத்து
இசையமைத்து பாடியவர்: ஏ.ஆர்.ரஹ்மான்